هل الفريق أحمد شفيق هو رئيس مصر ٢٠١٨

الواضح من المشهد الان ان الفريق احمد شفيق مختفي قسريا ام هذا ما يريدونا ان نراه واري شئ غريب في صورة الفريق شفيق وهو يأكل الموزه .. فاني اري ان الصورة ليست عفويه وبها مشهد تمثيلي فهل هو اجبر علي مسك الموزه كي يلتقطون صوره له حتي يظهر انه بخير  ويتمتع بحرية كاملة وهو في الحقيقه مختفي قسريا فعلا . ام صورت  لكي يظهر في صورة ان النظام الحالي  يخشاه  وانه هو البديل الحقيقي الذي سيدير الدولة لفترة  القادمه وخصوصا ان هناك  جانب من  كبير من المعارضه  بدأو بالفعل بالالتفاف حوله  ومن ضمنهم جزء من الاخوان وجزء  من شباب الثوره وانه هو الوحيد الذي سيستطيع جمع فئات الشعب و مختلف التيارات حوله.
وتذكرت الأن مقال دكتور محمود عمارة عن مذكرات كمال الشاذلي في جريدة المصري اليوم بتاريخ ٢٠/١٢/٢٠١٠ والذي قال بها كمال الشاذلي عن رايه توريث الحكم وقال بكره هتندموا علي الايام دي ان لم ياتي جمال مبارك او احمد شفيق من يمتلك ٧ مليارات جنيها سيحتل الكرسي الكبير......  وسؤالي الان هل الفريق احمد شفيق هو رئيس مصر القادم وسيخلفه جمال مبارك

شارك برايك

[Comment Box for Blogger]

مذكرات ثائر الحلقة الثانية ..... من بداية 25 يناير2011 وحتي نهاية 28 يناير 2011

صباح يوم 25 يناير  كان تجمعنا في الحي السابع  عشان نتحرك علي شبرا   انا وعفيفي وخالد محي واحمد بدوي وكان معاه ناس كتير وهدير كرارة ومني شقروف  وبالفعل اتجمنا واتحركنا علي شبرا  والمفروض انه مكان تجمع المتظاهرين في شبرا يكون في الدوران بس احنا وصلنا تقريبا قبل الميعاد بساعتين  انقسمنا وقتها فريقين فريق راح علي الدوران وفريق تاني راح علي ميدان فيكتوريا  وانا كنت مع الفريق الثاني وبالفعل اتجهنا لميدان فيكتوريا وهناك هتف احمد بدوي اول هتاف سمعته في الثورة ( يا محمد قول لبولس بكرة مصر تحصل تونس )  واحنا وراه طبعا وبعده هتف ( يسقط يسقط حسني مبارك ) واحنا وراه برضه حشدنا  الناس من الشوارع الداخلية  واتجهنا الي الدوران  احمد عفيفي كان مع المجموعه الثانية  اتصل بيا وسالني انتوا فين المظاهرة اتكردنت قولته يعني ايه اتكردنت قالي يعني عملوا عليها كاردون قولتله احنا في شارع شيبان وداخلين عليكم نفك الكردون وفعلا خرجنا علي شارع شبرا لقينا كاردون  حولين المظاهرة فاتحركنا ناحيتهم وفكينا الكردون وفجاه تهت من المجموعة اللي معايا وفوجئت بمظاهرة تانيه فيها ايمن نور فكلمت احمد بدوي  وكان وقتها عضو في حزب الغد  وقلتله ان ايمن نور جنبي قالي قوله ان الناس كلها بتتجه علي ميدان التحرير لسه هاقرب منه عشان اقوله لاقيت الضرب اشتغل بعصيان الامن المركزي   فاتحركت بسرعه وركبت تاكسي لميدان التحرير عشان احصل باقي المجموعه

وساعتها حصل موقف كوميدي جدا (...وقتها ركبت بعدي بشويه ست كبيره في السن وسالتني هو ايه اللي بيحصل قولتلها دي مظاهرات يا حاجه عشان الناس مش عاوزه حسني مبارك قالتي بصراحه الراجل كبر وكفايا كده البركه في جمال ابنه بقي بصراحه انا ملقتش اي رد اقولة ) واحبطتني بصراحة وصلت عبد المنعم رياض لاقيت  رتب كبيره وعربيات امن مركزي ماليه الدنيا ولاقيت نفسي بطولي خبيت العلم اللي كان معايا في الشنطه وفجاه لاقيت مسيرة داخله من شارع رمسيس وفي اولها احمد عفيقي واحمد بدوي ضميت علي المظاهرة ودخلنا ميدان التحرير وقنابل الغار اشتغلت علينا  وكان اول مرة في حياتي اشم ريحة الغاز وتهت للمرة الثانيه وبقيت كل شويه اقابل ناس من صحابي ونتوه من بعض لحد اما الدنيا ضلمت وشويه ولاقيت واحد بميكرفون طلع علي حرف الصنيه وبيقول جمال مبارك اخد طيارته وهرب والناس تهلل وشويه احمد عز هرب والناس تهلل وشويه شعب المحله اعلن استقلاله والناس مصدقه شويه وقابلت ناس زمايلي وطلعنا علي بيتهم في المهندسين واتغدينا والناس هناك ولا دريانه باللي بيحصل في التحرير خلصت ورجعت تاني علي الميدان وفضلت شويه وروحت و تاني يوم عرفت باللي حصل في السويس وبدانا نجهز للنزول يوم الجمعة 28 يناير وكان الاتفاق علي الخروج من جامع باب الشعرية  يوم 27 اتجمعت مع ناس اتعرفت عليهم من علي النت  حبيت اشوف باقي الناس بتتحرك ازاي وبتفكر ازاي فارحت معاهم المركز الديموقراطي في الدقي وفوجئت باحمد بدوي ضمن  الناس اللي هناك  ولاقيت بنت هناك (عرفت بعدها انها اسراء عبد الفتاح ) بتقطع في ورق احمر وتقطعوا هي والمجموعه علي شكل الكروت بتاعة حكام كرة القدم علي اساس اننا نرفع كروت حمراء  في الميدان لمبارك ونقولة ارحل روحت بليل لاقيت صحابي جمال صفوت ومحمد حمدي واقفين تحت البيت قولتلهم انا حاسس ان الدنيا هتتقلب بكرة وان فيه حاجه جامده هتحصل فضل جمال يقولي انت عاوز تبوظ اللبلد انت عميل لدوله اجنبية قولي مين بيمولك ووكنت مزهول طبعا من رد فعله

تاني يوم اتجمعنا انا وعفيقي واحمد طاحون وهدير كرارة واسماء وايه عكاشة في اول مكرم عبيد ووقتها اكتشفنا كلنا ان موبايلتنا كلها مفيهاش شبكة واتحركنا علي باب الشعرية علي اساس اننا نصلي الجمعة هناك ونحشد الناس لميدان التحرير خلصنا صلاه وقام عفيفي طلب من الامام صلاه الغائب علي شهداء السويس في الاول الامام عمل نفسه مش سامع بس الناس في الجامع اصروا علي الصلاه وخلصنا صلاة وطلع عفيفي برة الجامع  وهتف يسقط يسقط حسني مبارك واحنا وراه وفجاه طلع شيخ من بتوع الازهر انتو عيال مش متربيه عملكوا ايه حسني مبارك منتوا عايشين في خيره وكلام بقي من ده كتير ماخددناش في بالنا من كلامه ووقتها  وفضلنا نلف في الشوارع نهتف عددنا مكنش كبير طلع علينا بوكسين شرطه واتعاملوا معانا وقتها باحترام طلبوا مننا ان كل واحد فينا يمشي في ناحية بس احنا كان جايلنا ناس تانيين من صحابنا في ميدان باب الشعرية كان منهم شهاب وجيه و مصطفي شرف واحمد ومصطفي ابو العز مجموعة ركبت مع شهاب في عربيته ومجموعه وانا منها ركبنا تاكسي علي اساس نتحرك علي التحرير لكن للاسف الطريق كان مقفول ونزلنا شبرا وريحه الغاز كانت مالية الشوارع وقتها تقريبا  وركبنا  تاكسي تاني نزلنا ميدان الاوبرا شوارع وسط البلد كلها كانت مليانه اشتباكات بين الناس والشرطة وكان كر وفر من جميع النواحي والاتجاهات دخلنا في وسط الاشتباكات وصوت الرصاص وقنابل الغاز كان مالي الدنيا والكل عينه مدمعة من اثار قنابل الغاز وعربيات الاسعاف رايحه جايه تشيل في ناس والغريب ان كان اي حد بيقع في الداخلية كانت الناس بتشيله وتسعفه وناس تانيه اما كانت بتصدق تمسك اي عسكري عشان ياخدو الخوذه والدرع بتاعه وعمالين يتصورو بيهم  مشاعر ملخبطه بين خوف ورعب وغل وطيبه ورحمه وخوف علي الطرف الاخر اللي بيضرب فينا  ازاي بيضربني واجري اسعفه  وببص لاقيت عفيفي قدام في اول المظاهرة وطي شال قنبله غاز من الارض ورماها علي الداخليه تاني وشويه و اترمي تحت رجلي قنبله غاز حبيت اعمل زيه نزلت علي الارض اجبها معرفتش اقوم تاني ووقعت علي الارض وببص بعيني لقيت الدكتورة اسماء عكاشه بتجري وعماله تقع علي الارض وتقوم تجري تاني جمعت قوتي تاني وقمت وراها وهي بتصرخ اختي فين اختي فين قولتلها اختك ايه بس دلوقتي ودخلنا استخبينا في مدخل سينما لا قينا اختها هناك  

                                                                  ده فيديو من الحدث      


ومع الكر والفر مبقيناش قادرين نقف علي رجلينا من ريحه الغاز  لقينا نفسنا في التوفيقيه اخدنا عفيفي علي مركز هشام مبارك عشان نرتاح من الضرب  وكان فيه ناس كتير فوق اللي مغم عليه واالي مش قادر يقف الحاله كانت صعبه جدا  شويه والناس اللي شغاله في المركز بيسعفوا فيهم وكان مالك مصطفي معاهم  واختفي عفيفي  ومظهرش تاني يومها  بعد لما ارتحت شويه نزلت اشوف الدنيا فيها ايه لاقيت الاشبتاكات شغاله وناس من الشباب بيعملوا خط فاصل بين الداخلية وبين المتظاهرين والارهاق واضح علي كل الاطراف وفجاه طلع من وسط الناس شاب بيزعق والناس شالته لفوق وهو بيقول الجيش نزل عند المتحف المصري وبعدها الكل هلل وفرح وقعد وعلي الارض عشان يرتاحوا من التعب والارهاق طلعت جري علي المركز بتاع هشام مبارك عشان ابلغ الناس اللي فوق باللي حصل لاقيتهم فاتحيين الراديوا والجيش بيزيع بيان حظر التجوال الكلام ده كان الساعه 5:20 تقريبا وميعاد الحظر الساعه 6  والوقت ضيق  ظهر احمد سيف الاسلام الله يرحمه وقال للناس اللي عاوز يبات يبات بس مجموعه منكم تتطوع وتنزل تجيب اكل للناس اللي هتبات انا بالنسبه ليا مكنش ينفع اني ابات لسببين اهلي في البيت ميعفروش اي حاجه عني وثانيا عشان البنات اللي كانوا معايا  وهنا بقي كان في مشكلة ان مفيش اي مواصلات فقررنا اننا نتحرك مشي في اتجاه مدينة نصر وربنا يسهل وناس كتير قوي كانوا ماشيين في الشوارع عاوزين يروحوا زينا  وبالفعل واحنا ماشيين عربية ملاكي وقفتلنا بس شرط انه ياخد اجرة  تاكسي قولت في سري ايه الاستغلال ده بس مكنش عندي بديل المشكلة وقتها ان كل واحد فينا ساكن في ناحيه انا عن السراج مول وبنتين عند شروق النادي الاهلي وبنت في الماظه  فروحت علي السراج وقولت اخد العربيه واروح الكل وحظي الجميل ان كان معايا مفتاح العربية بس ريموت الانذار مكنش معايا ومكنش في مجال اني اطلع البيت لان لو عملت ايه مكنوش هينزلوني تاني فاخترت اني اتحرك بالعربيه واستحمل صوت الانذار طول ما انا  ماشي واللي كان عامل جو مع القلق اللي كان في الشوارع وصلت الجميع وسيبتلهم رقم تليفون البيت يكلموا اهلي يطمنوهم لحد ما اوصل وطول الطريق وانا راجع من الماظه الجيش عمال يقفل في الشوراع والناس عماله تجري وانا بجري بالعربيه وصوت الانذار شغال كان  عامل جو رعب بصراحه ليا وللناس اللي حواليه وخصوصا اني مكنش عارف ايه اللي هيحصل بعد كده  روحت البيت لاقيت ابويا وامي منهارين واسقبالهم ليا كاني مسافر بقالي 20 سنه   بعد كده ابويا بقي ينزل معايا المظاهرات وطلب مني اعمله فيس بوك

شارك برايك

[Comment Box for Blogger]

مذكرات ثائر الحلقة الاولي ..... ما قبل 25 يناير

سبب كتابتي لمذكرات مشاركتي في ثورة 25 يناير بكل احداثها عشان عاوز الناس تعرف احنا ليه مش راضين علي الوضع الحالي وليه مكناش موافقين عليه من الاول وان ده مجاش بين يوم وليله وان ده نتيجة احداث متسلسة وان موقفنا ما هو إلا رد فعل علي مواقف حصلت معانا مواقف هتفسر حاجات كتير للناس اتمني اني انجح في توضيح الصورة كاملة .... تحياتي للجميع

لم يكن لدي اي تفكير او انتماء سياسي  و كانت نشاطاتي تقتصر علي المشاركه في الاعمال الخيرية باحد الجمعيات الخيرية الكبيرة كمتطوع باكثر من نشاط و كان من ضمن هذه الانشطة نشاط القوافل والذي كان يسافر الي القري الفقيرة النائيه لتقديم المساعدات لاهل هذه القري ورايت في القري اسر معدمة تحت الصفر لاتمتلك قوت يومها يعيشون علي مساعدات وعطف  الاخرين وكنت لا اتصور يوما ان هناك اسر تعيش بهذه الطريقة اسر تعيش اقل من الحيوانات الاليفه التي تربي بالمنازل  لدرجه اني كنت اعود الي منزلي وانا ابكي علي الحال الذي وصلت اليه هذه الاسر وشعرت بغضب شديد من الدولة والحكومة بل ورئيس الجمهورية فالحال الذي وصلت له هذه الاسر هو مسئولية الدولة وبدأت وقتها  انظر الي الدوله بشكل اوسع بدات اري حجم السرقة والرشوة والفساد الذي في الدولة بدات اري الظلم والقهر الذي يعيش فيه المواطن المصري بدأت اري انتهاكات الداخلية

ومن هنا كانت اول مشاركتي السياسيه بدأت بقصيدة ضد مبارك اطالبه فيها بالرحيل و قمت برفعها علي موقع الفيس بوك وفوجئت بترحيب وتفاعل من بعض الاصدقاء والبعض الاخر كانت تعليقاتهم امسحها عشان متروحش في داهية وطبعا ممسحتهاش لاني كنت مقتنع باللي عملته .

الغريب بقي ان بعد كام يوم القصيدة اختفت من علي الفيس معرفش ازاي كنت هاتجنن وقررت وقتها اني ارفعها تاني علي الفيس بوك وده كان نص القصيدة

ارحل يا ريس كفايا خداع .......................وسلم علينا سلام الوادع

               بص شوف فى عهدك جرى لنا ايه 

فيه ابن باشا وفيه ابن بيه...... وفيه الى مافيش فى جيبه حتى الجني

 الباشا دايماً نضرب له سلام ......واى حد تانى ياخد بالحزام 

اطفال وناس بتاكل زباله فطارها وغدائها وعشاها زباله 

ارحل يا ريس كفايا خداع .......................وسلم علينا سلام الوادع 

ناس طالعه نازله راكبه اتوبيس ................... وناس عربيتها جايه من باريس 

مكاتب شوارع مليانه رشاوى ...........هتدفع هتدفع من غير فتاوي

 ارحل وسيبنا انت وجمال................احسن ما يضحك علينا العيال

بلد وسايط ومليانه كوسه ................ ارحل يا حسنى وليك منى بوس

                بص شوف فى عهدك جرى لنا ايه 

ارحل وخد معاك كل بيه ..................... ده كيلو اللحمه ب 50 جنيه 

بلدنا دى فيها كل كبير ........................... بيكبش فلوسه من دم الفقير 

من يوم ما جيت دقنا الفساد........................ ارحل وسيبنا وسيب البلاد 

ارحل وسيبها بسرعه لغيرك........................ ارحل وسيبها وحكم ضميرك 

ارحل وسيبها وخليك عظيم .................... اسمع ونفذ نصيحه كريم

وده لينك القصيدة علي الفيس بوك

https://www.facebook.com/notes/karim-elzyady/%D8%A7%D8%B1%D8%AD%D9%84-%D9%8A%D8%A7-%D8%B1%D9%8A%D8%B3-%D9%83%D9%81%D8%A7%D9%8A%D8%A7-%D8%AE%D8%AF%D8%A7%D8%B9-%D9%88%D8%B3%D9%84%D9%85-%D8%B9%D9%84%D9%8A%D9%86%D8%A7-%D8%B3%D9%84%D8%A7%D9%85-%D8%A7%D9%84%D9%88%D8%A7%D8%AF%D8%B9/115591458479527?%20pnref=story 

وفي يوم 6 ابريل 2010 ووقتها مكنتش اسمع اي حاجه عن تنظيم 6 ابريل المهم يومها  كنت نازل وانا وامجد زميلي من الشغل وعربيتي كانت مركونه في جراج عند اخر كوبري قصر النيل ويومها وسط البلد وكوبري قصر النيل كانوا مرشقين بالشرطه  وفي لحظه وبدون مقدمات  وقفنا 2 امناء شرطه علي الكوبري وطلبوا يفتشونا فتشوا امجد واما جه دوري رفضت اني اتفتش بس للاسف اخدو مني الشنطة بالعافيه وفتشوها المشكله بقي ان القصيدة اللي كتبتها كانت مطبوعه وكنت حاطتها في الشنطه بس الغريب انهم لما فتشوا الشنطه ملقوش حاجه وانا لغايه دلوقتي معرش القصيدة راحت فين بس  هاقول الحمد لله ربنا ستر يومها .

المهم روحت يومها بغلي ومش طايق نفسي وقولت وقتها ان كفايا كده علي مبارك ونظامه وقررت اكتب قصيدتي التانية و كان نصها 

ملعون ابو ام قانون الطوارئ

ان كنت عاقل او مجنون ...............................هتلعن ابو ام ده قانون 

من غير احم لا دستور ..........................ياخدوك ويقولو حق الدستور 

يجى سعاده الباشا شويش ..........................فى جيوبك ينزل تفتيش

وان قولتلته ليك كده يا شويش......................ينزل فيك ضرب وطلطيش 

دستور ظالم يدى الحق...................................لواحد جاهل ينزل زق 

طب لو كنت مواطن صالح ............................تعمل ايه لو يوم تفتش 

ايه احساسك قدام نفسك .............................. يلا روح عيط ل امك 

ده القانون دوت مشهور .................................يقدر ياخدك 6 شهور 

ولو معاك حاجه مش مظبوطه ....................ب 10 جنيه هتبقى مظبوطه 

نزعل ونقول بره بنتهان ....................... و هو فى بلدك بيعملوك انسان 

ملعون ابو ام ده قانون 

وعجبى!!!!!!!!!!!!!!!!!!!!!!!!!

وده لينك القصيدة علي الفيس بوك

https://www.facebook.com/notes/karim-elzyady/%D9%85%D9%84%D8%B9%D9%88%D9%86-%D8%A7%D8%A8%D9%88-%D8%A7%D9%85-%D9%82%D8%A7%D9%86%D9%88%D9%86-%D8%A7%D9%84%D8%B7%D9%88%D8%A7%D8%B1%D8%A6/106690106036329?pnref=story

وكان فيه واحد صاحبي اسمه هيثم كان بيشجعني بعد كده عرفت انه كان في اللجنه الاعلاميه ل 6 ابريل فضلت الدنيا مريحه جدا معايا من غير اي شئ لحد يوم 15 يناير 2011 اما شوفت البوست بتاع صفحة كلنا خالد سعيد  وكانوا كاتبين فيه انهاردة 15 يناير وباقي 10 ايام علي يوم 25 يناير عيد الشرطه نقد نعمل فيهم حاجه

ساعتها قررت اني انزل وشجعني علي ده هيثم صاحبي وقتها مكنتش عارف ابدا منين وهنزل فين ومع مين اتفقنا انا وهيثم اننا هنطبع شويه منشورات نقنع الناس فيها انهم ينزلوا يوم 25 ونبتدي نوزعها في شارع عباس العقاد واتفقنا اننا نبعد عن الاماكن اللي فيها كاميرات زي اماكن البنوك واماكن ال ATM   بعد كده انضم لينا حد ثالث اسمه حامد بس مكلملش وقتها لظروف مرض والدته

بعدها اتفرجت علي الفيديو بتاع اسماء محفوظ واللي كانت بتدعي الناس فيه للنزول يوم 25 يناير اتسغربت جدا من جرأتها وجه شجعني كتير في قراري بالنزول

وبدأت اكتب علي الفيس بوك اني نازل ودعيت الناس للنزول  وفجاة لقيت زمايلي واخدين جنب مني وخايفين مني لا كمان فيه ناس بتتريق ومش مقتنعين ان فيه حاجه هتحصل كان ردي عليهم اني واثق ان 25 يناير هتتسجل  ثورة في تاريخ مصر ورفعت الصورة دي علي الفيس بعد كده وكتبت عليا انا هنزل ثورة 25 يناير وده كان يوم 20 يناير

https://www.facebook.com/photo.php?fbid=1690699360289&set=a.1660810573088.85113.1621910768&type=3&theater

  لحد ما لقيت بنت عندي علي الفيس بوك كاتبه بوست ( شوية عيال فاكرين انهم هيقدروا يغيروا حاجه ) فرديت عليها رد انا مش فاكر كتبت ايه بس كنت بعترض  علي كلامها ومن بين التعليقات الي عندها لاقيت حد حاطط صورة خالد سعيد بروفيل  وكان  اسمه احمد مندور وكان مؤيد كلامي فاتكلمت معاه وعرفت انه من مدينة نصر وانه نازل يوم 25 يناير وان فيه مجموعه شغال معاها بصراحه وقتها كنت قلقان منه المهم حددت معاه عند كافيه فوت بول اللي في الحي السابع كلمت هيثم ورحنا الميعاد واما وصلنا للميعاد والمكان كنا قلقانين انه يكون كمين بس سعاتها اكتشفت انه هو كمان كان قلقان زينا وخايف اننا نكون كمين معموله المهم اتشجعنا وكلمنا بعض واتحركنا لكافيه تاني كان قاعد فيها باقي فريق العمل واتعرفت وقتها علي المجموعة اللي كملنا بعض بعد كده وكانوا  احمد عفيفي  و احمد بدوي و احمد طاحون و خالد محيي

اتفقنا وقتها اننا ننزل تاني يوم نوزع منشورات وان لو حد مننا اتمسك نعمل كاننا ولا نعرفه عشان الباقي يكمل واتفقنا اننا نعمل ايفنت مكتوب فيه صراحتا كده اننا هننزل بكره قدام شبراوي السابع عشان نوزع منشروات عشان نقنع الناس انها تنزل يوم 25 يناير واتفقنا اننا هنكتب ارقامنا انا واحمد بدوي في الايفنت

 بعد لما روحت حسيت  بخوف ورعب شديد من اني كتبت رقمي وكنت كل ما اسمع صوت سرينة الشرطه كنت بتنفض من الخوف وخصوصا انا يومها قبللت ظابط معرفه قديمه وقالي انهم عندهم تعليمات بالضرب في المليان  ان لو واحد حرق نفسه يحضنه ويموت معاه

وجاء اليوم التالي وموعد توزيع المنشورات وبالفعل اتجمعنا ومحدش جه غيرنا ووزعنا المنشورات علي الناس في الشارع وعلي السيارات وحصل موقف كوميدي كان عفيفي بيحط منشور علي عربيه  عدي بوكس شرطة من جنبه فذي ما اتفقنا عملت من بنها ولا كاني اعرفه بس البوكس  ما اخدش باله ولا عفيفي اصلا اخد باله

واليوم عدي علي خير الحمد لله ومحصلش اي حاجه واتفقنا ان احنا هنتاقبل تاني يوم مع مجموعه تانيه في كافيه قدام نادي الشمس اتذكر انه كان كوستا واليوم ده كان هيوافق 24 يناير 2011

وفعلا اتقابلنا مع مجموعه مش متذكر فيهم غير حاتم و هدير كراره وظبتنا واتفقنا اننا هنخرج مع مجموعة شبرا  ومشينا انا ومجموعتي وفضلنا نلف بالعربية  باعلام  مصر في شوارع مساكن شيراتون وشواع مدينة نصر وعباس العقاد وكنا مشغلين اغنيه رامي دنجوان ضد الحكومه وكنا بنهتف في الشوارع ببكرة 25 يناير بكرة الثورة كلنا هننزل حسيت ان في ناس متفاعله معانا وناس بتبصلنا وتقول ايه المجانين دول بس احنا كان عندنا امل ومؤمنين بفكرتنا 

روحت البيت لقيت ابويا اتسرب ليه خبر نزولي تاني يوم ومتعصب عليا وبيقولي مظاهرات ايه اللي انت عاوز تنزلها رديت عليها بحده لاول مرة في حياتي قولتله انا عمري في حياتي مكسرت ليك كلمه بس المرة دي معلش انا مهما حصل هنزل بكره  كفايا بقي اللي البلد فيه سيبونا بقي مرة واحدة نقرر احنا عاوزين نعمل ايه بصراحه سابني وسكت ومتكلمش معايا

 

تفاصيل يوم 25 يناير في الحلقة الثانيه من مذكرات ثائر

شارك برايك

[Comment Box for Blogger]